Паремические жанры в коми фольклоре

«История коми литературы» небöгын 1 томын Ф.В. Плесовский «Пословицы и поговорки. Загадки» статьяын гижö, мый коми шусьöгъяслы да кывйöзъяслы скодитö В.И. Дальöн сетӧм определение: «Шусьöг – сiйö дженьыдик притча… Тайö донъялöм, кывкöрталöм, велöдöм. Кывйöз – сiйö гöгöртана шуöмтор, сэтысь кывкöрталöм он аддзы. Кывйöз – шусьöглöн воддза джынйыс». Сiдз жö автор гижö, мый шусьöгъяс да кывйöзъяс йöзöдлöны небöгъясын орччöн, сы вöсна мый ыджыд торъялöм на костын абу: шусьöг вермö лоны кывйöзöн и, мöдарö, кывйöз вермö лоны шусьöгöн.

Грамматика боксянь кö видзöдны, то шусьöгъясын да кывйöзъясын тыдовтчö клишелöн 2 ыджыд тип – абу öтдортчöм (незамкнутöй) сёрникузяяс, абу öтдортчытöм клише – тайö кывйöзъяс, да дзоньöн клишируйтöм сёрникузяяс, либö öтдортчöм сёрникузяяс – тайö шусьöгъяс (42,1970.).

Ф.В. Плесовский лыддьö, мый медся стöч определение шусьöглы  сетöма В.П. Аникин: Шусьöг – тайö дженьыд, сёрни бергалöмö пырöм, велöдана вежöртаса, вежласянöда (ритмическöй) поэтическöй изречение, кодын войтыр уна нэмъяс чöж öтвывтiс (обобщайтiс) ассьыс социально-историческöй опытсö (3, 1957. -  С.11.).

Учёнöй сiдзжö индö, мый коми шусьöгъяс да кывйöзъяс артмисны ёнджыкасö крестьяна пиын, петкöдлö налысь идеологиясö, кодi артмöма феодальнöй кадколастö натуральнöй овмöс вылö подуласьöмöн.

Шусьöгъяс да кывйöзъяс  - тайö тöдчана источник, медым велöдны оланног да удж найöс лöсьöдысьяслысь. Комияслöн, мукöд войтыркöд öткодялöмöн (сравнитöмöн), эм уна шусьöгъяс да кывйöзъяс вöралöм йылысь. Тайö сы вöсна, мый комияс важысянь вöралiсны, кыйсисны. Эмöсь сiдзжö шусьöгъяс да кывйöзъяс чери кыйöм йылысь, но медунаöсь му вöдитöм  да скöт видзöм йылысь. Сiдз жö эм вöр-ва да сыын мортлöн места йылысь. Морт, кыдз шусьöгъяслöн медшöр объект, петкöдлöма зэв тырвыйö. Шусьöгъяслöн да кывйöзъяслöн торъяланторнас, аслыспöлöслуннас лоö синтаксическöй да логическöй характера параллелизм. Синтаксическöй параллелизм артмöдчö орччöдöмöн (сопоставлениеöн), сiдзжö паныдöн сувтöдöмöн (противопоставлениеöн).

Шусьöгъяслöн аслыспöлöслун - склад да мера – сiйö артмöдчö, композиционнöй тэчас кындзи, öд вежласян (ритм) схемаясöн, шы (звукöвöй) мöдпöвъёвтöмъясöн, художествоаа тропъясöн и тшöкыда – аслыспöлöс кывворöн. Налы характернöйöсь öтгор (рифма) да ассонанс.

Нöдкывйöн важöн вöдитчылiсны кыдз обрядлöн юкöнöн. Коми нöдкывъяссö чукöртöма уна, но найö абу  уна пöлöсöсь (разнообразнöйöсь).

Фольклористъяс тöдчöдöны, мый нöдкывъяслöн содержаниеын да образностьын тыдовтчö уна öткодьлун мукöд войтыръяслöн фольклорын, мый оз позь шуны шусьöгъяс да кывйöзъяс йылысь. Уна öткодьыс роч да коми нöдкывъяс костын. Ф.В. Плесовскöй гижö, мый тайö абу генетическöй öткодьлун, а  роч фольклорлöн коми вылö влияние. Сiдзжö öткодьлун тыдовтчö карел, удмурт, марий войтырлöн нöдкывъяскöд, тайö сы понда, мый найö нöдлiсны сiйö жö предмет да лоöмторъяс йылысь, а мукöдсö найö тшöтш босьтiсны рочъяслысь. Но ученöй сiдзжö тöдчöдö, мый комияслöн эм уна и аслыспöлöс нöдкывъяс, кодъяс шымыртöны и вöр-ва, и горт гöгöр, и крестьяналысь удж.

Историческöй аспект боксянь видлавны коми нöдкывъяс оз позь, сöмын позьö стöча шуны, мый артмисны найö важöн нин и петкöдлöны ёнджыкасö крестьяналысь олансер (быт) и феодализм да капитализм кадколастö удж. Тöдчанаöн лоö сiйö, мый комияс нöдлiсны ёна му вöдитöм йылысь, шабдiöн ноксьöм йылысь, но зэв гежöда чери кыйöм йылысь и пöшти оз кыйсьöм-вöралöм йылысь. Автор лыддьö, мый талöн помканас лоö сiйö, мый унджык нöдкывсö лöсьöдлiсны нывбабаяс, и индö, мый та понда мед уна нöдкывйыс шабдi нокöм йылысь, кысьöм йылысь. Найö уна пöлöсöсь (разнообразнöйöсь), торъялöны аслыспöлöслуннас, а му вöдитöм йылысь нöдкывъяс унджыкнас рочысь босьтöм.

Аслас тэчас сертиыс коми нöдкывъяс, кыдзи и мукöд войтырлöн, ас пытшкас босьтöны метафора и подуласьöны вежöнасьны вермытöм вылö (параллелизм вылö). Аслыспöлöслуннас лоö сiйö, мый нöдкыв – стöч (конкретнöй), но öти предметъясöс мöдъяскöд  кутшöмкö, мукöддырйи ылöс, признакъяс серти öткодялöм (уподобляйтöм) сетö налы аслыспöлöс поэтичность. Метафоричность артмöдан мöд приёмöн лоö паныд сувтöдан да абу лöсялöм приём: ыджыд да ичöт числö костын: Комын вок öти, пöдушка вылын куйлöны (матич); кузь да дженьыд костын: Кузь-кузь гез, небесаöдз  судзö, а юр гöгöрыд оз судз (видзöдлас); предметлысь, субъектлысь во гöгöр либö сутки чöж разнöй признакъяс, свойствояс, ыдждаяс тöдчöдöм: Лунын скамья, войын сийöс (пон); Тöвнас узьö, а гожöмнас шумитö (шор); предметлöн вылыса мичлы скодиттöм свойствояс: Мича-мича молодеч да век стенлань банöн куйлö (чер); вöр-валы скодиттöм лоöмторъяс: Турун сёя – пиньöй ныжмас, лыа сёя – бара лэчмас ( ытшкыгöн да лэчтыгöн коса).

Логика боксянь уна нöдкыв подуласьöма парадокс вылö.

Сiдз жö вöдитчöны образсö тшупöда векньöдöмöн (ступенчатöй сужениеöн). Во гöгöрся кад, например, öткодявсьö пукöд: Кузь-кузь пу, дас кык йöзви, нёль ув и сизим коль (во, тöлысь, вежон, лун). Кор предметсö персонифицируйтöны, то ёнджыкасö пыртöны вокъясöс, чойясöс, мамöс да айöс, а мукöддырйи сöмын казьтыштöны мортлысь ним: Быд керкаын Кузьма да Кöнö (кузь да дженьыд лабич).

Нöдкывъяс отсалöны мортлын дасьтыны сюсьлун, писькöслун, ас гöгöрсö бурджыка кывны (чуствуйтны), лэптыны удж дорö да ас му дорö радейтöм. Нöдкывъяс вöр-васö, уджалан кöлуй (орудие), асьсö мортсö метафозируйтöмöн да поэтизируйтöмöн велöдöны аддзыны мичсö.

Коми фольклор хрестоматияын Филиппова В.В. торйöдö афоризм нога жанръяс тадз:

• Шусьöг:
• Шусьöг: Ас вöр-ваад быд пу нюмъёвтö;
• Максима-шусьöг: Рам морт вылын серавны оз ков: рам мортсö ваыс мыськас, нянь вердас да сiйö мортöн лоö;

• Афоризм-шусьöг: Сюсь мортыд му пыдöссьыс и ва пыдöссьыс тöдö;
• Примета-шусьöг: Дзодзöг вуджö – гöрны - кöдзны позьö.

• Нöдкыв:

• Нöдкыв – юалöм: Мый тув йылö оз öшйы?(кольк);

• Нöдкыв – диалог: Чикыли-мукыли, кытчö мунан? – Чöö, вежöм урöс, асьтö лöсалöны и гогналöны (ю да берег);

• Нöдкыв-метафора: Öти шыр да кык бöж (кöтi).

Сiдз жö торйöдö афоризм нога мукöд жанръяс:

• Йöзкостса афоризм: Быдöн ассьыс шудсö корсьö
• Кывйöз (кывйот): Киссьöм ватö он курышт
• Присловье: Мыськöм сёркни кодь.

Вöччöм гыр кодь.

• Видчанкыв: Яндысьтöм син.
• Ёранкыв: Син пинь горшад.
• Бурсиöм: Бур туй; Туны-быдмыны.
• Клятва: Мед меным му пырыс мунны.
• Пустоговорка: Кор? – Кор корйыс потö.
• Шмонитан вочавидзöм: Мый? – Сола вый.

И сiдз, войтыр олöмын разнöй кадколастö паныдасьöны паремика жанръяс вылö разнöй видзöдласъя. Быд учёнöй ас ногыс видлалыс да торйöдалыс найöс. Сöмын тырвыйö падъявтöг позьö шуны, мый шусьöг, кывйöз да нöдкыв унджык исследовательяс  лыддьöны асшöр жанръясöн.

И век шусьöг да кывйöз, кужöмöн вöдитчигöн, отсалöны яръюгыдджыка да образнöя висьтавны мöвп, восьтны кывлысь мичлунсö да стöчлунсö, сылысь бырлытöм озырлунсö. Найö вöчöны сёрнисö ловъяöн да тöдчанаöн, дженьыдöн да инмаланаöн (меткöйöн), гöгöрвоанаöн уналы.

Став тайö аслыспöлöслуныс (дженьыдлун, тöдчанлун да инмаланлун) сетöны позянлун войтырлы тöд вылын кутны найöс да водзö  вуджöдны (передавайтны) кöленаысь кöленаö, петкöдлыны на пыр мöвпъяс да сьöлöмкылöмъяс, виччысьöмъяс. Вот мый понда найö век кольöны олöмын, кыдз и народнöй сьыланкывъяс, мойдъяс да мукöд мортлöн великöй творениеяс. (30, 1987. – С. 85).

Нöдкывъясын вöр-васö да мортсö поэтизируйтöм висьталö сы йылысь, мый комияс важысянь аддзисны асланыс удж помысь (результатысь) мичлун; зэв мичаöн налы вöлi сiйö, мый найöс кытшалiс, мый найö вöчисны ас киöн. И та понда нöдкывъяс, мортын сюсьлун, писькöслун да ас гöгöрсö ёся гöгöрвоöм сöвмöдiгöн, сöвмöдiсны войтырын удж дорö, ас му дорö радейтчöм.  Именнö таын заключайтчö нöдкывъяслöн не сöмын тöдöмлун сетöм (познавательность), но и велöдан роль. (14, 1975. – С. 10.).

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

2. Коми фольклорын паремика жанръяс система

2.1. Паремиялы да  паремика жанръяслы определение  сетöм

Аслыспöлöс группа артмöдöны сiдз шусяна фольклорлöн ичöт жанръяс. Найö артмисны важöн и йитчöмаöсь мифологическöй вежöртöм спецификакöд да олöм вылö первобытнöй видзöдласкöд <…>. (20, 2004. – С. 228-229.).

Фольклорлöн ичöт жанр – тайö паремияяс. И медым бурджыка гöгöрвоны, мый сiйö «паремия» да паремика, паремика жанръяс, кутшöм налöн эм аслыспöлöслун, мый на костын öткодьыс, колö бура гöгöрвоöдны да сетны налы стöч определениеяс.

Медводз колö индыны, мый паремия – тайö торъя текст, а паремика – став жанр öтувтысь понятие, рöдöвöй понятие.

Медым бурджыка восьтны «паремия» терминлысь вежöртассö, колö шыöдчыны кывчукöръяс дорö.

И сiдз, «Восточнославянский фольклор» наука да народнöй терминология кывчукöрын тайö терминлы сетсьö татшöм определение: паремия – тайö фольклор афористическöй ичöт прозалöн рöд понятие <…>. Медводдза вежöртасыс – Вежа Гижöдысь (Святöй Писаниеысь) притча лыддьöм, кодöс лыддьысны вичкоын праздник лун водзын рытья богослужение дырйы. Притчаа небöгъяс шусьылiсны - паремионикъясöн. Öнiя фольклористикаын паремия – тайö сiйö жö шусьöг, сöмын кывлöн паськыд вежöртасын. (5, 1993. –С. 181.).

Интернетысь босьтöм «Википедия» кывчукöрын сетöма татшöм вежöртас: паремия (греч. παροιμία — кывйöз, шусьöг, притча) — вежласьтöм фразеологическöй единица, кодi асьсö петкöдлö кыдз вöйпöдан (дидактическöй) вежöртаса помалöм сёрникузя. Паремияяс петкöдчöны кыдз сёрни клише, образность да афористичность сертиыс найö матынöсь «борда кывъяскöд», но торъялöны наысь асланыс автортöмлуннас (анонимностьнас) (62.).

Паремияяс велöдан наукаöн лоö паремиология (др. греч. paroimia — притча, шусьöг да logos — кыв, учение). Тайö — фразеологиялöн подраздел, филологиялöн раздел. Сiйö сиöма паремияяс (шусьöгъяс, шусьöга выражениеяс, паныда шусьöгъяс (антипословицаяс), кывйöзъяс, валльеризмъяс, девизъяс, слоганъяс, афоризмъяс, максимаяс, нöдкывъяс, приметаяс и мукöд изречениеяс) велöдöм да классификациялы.

Паремиология  топыда йитчöма  паремиографиякöд  — тайö дисциплина, кодi чукöртö, видзö да обрабатывайтö став материалсö, кодъясöн вöдитчöны исследователь-паремиологъяс. Сравнительнöй (компаративнöй) паремиология велöдö разнöй войтыръяслысь да культураяслысь паремияяссö (63.).

Паремика же – (греч. рaroimia) определяйтö  изречение, дженьыд да инмалана торъя мöвпъяслысь, понятиеяслысь петкöдчöмсö. (30, 1987. – С. 84.).

Мый жö колö пыртны паремика жанръяс улö? Кутшöм жанръяс лоöны ассшöрöн? Паремика жанръяс öта-мöдныскöд йитчöмаöсь, тшöкыда öтиысь вуджöны мöдö, найö зумыдöсь, ичöтöсь да унджыкысьсö муртöсаöсь (рифмованнöйöсь). Ставыс тайö сьöктöдö паремиологъяслысь удж – торйöдны да классифицируйтны найöс.  Бöръя кадö ученöйяс стöча юкöны сöмын шусьöг, кывйöз да нöдкыв кыдз асшöр паремика жанръяс. Но сiдзжö индöны, мый на костын уна öткодьлуныс.

И сiдз, шусьöг (эст. vanasõna)–  тайö асшöр суждение, кодi логика боксянь тырвыйö эштöма. Петкöдчö кыдз прöст да сьöктöдöм сёрникузя, форма боксяньыс сiйö öтдортчöм (замкнутöй) клише. Топöдöм (сжатöй) формаын шусьöгъяс кывкöрталöны олöмын лоöмторъс бöрся видзöдöм (наблюдение), петкöдлöны на пиын характернöйсö да аслыспöлöссö, сетöны öтвывтан кывкöртöд, кодöн позьö вöдитчыны öткодь лоöмторъяс да событиеяс характеризуйтiгöн. Вöдитчöны веськыд да вуджöдана вежöртасын либö сöмын вуджöдана вежöртасын. (5, 1993. –С. 266.).

В.И.Даль, «Толковый словарь живого великорусского языка» кывчукöрын, гижö, мый «шусьöг – тайö дженьыд изреченье, войпöдысь, ёнджыка притча кодь, кытшлöдлöм (иносказание) либö олöмлöн приговор öбликын (видын), <…>, оз кодöнкö мöвпыштчы, а чужö ачыс; тайö войтырлöн сюсьлун <…>». (53, 1955. – С. 334).

Ф.И. Буслаев шусьöгъяс видзöдалö кыдз ас кывлысь художествоа произведениеяс, кодъяс «петкöдлöны войтырлысь олансерсö, сылысь «здравöй смыслсö» да нравственнöй ыштöмсö (интерессö)». (Исторические очерки русского народа словесности и искусства. – Т.1. – СПб., 1861 – С.80). Н.В. Гоголь содтö, мый найö «…абу водзвыв сетöм кутшöм-либö видзöдлас либö делö вöчны вöзйöг, но уже делöыслы вöчöм кывкöртöд,<…>». (Собр. соч.: В 6-ти т. – Т.6. – М., 1950. – С.164.).

Ф.В. Плесовский медстöчнас лыддьö «История коми литературы» небöг 1 томын «Пословицы и поговорки. Загадки» статьяын В.П. Аникинöн сетöм определение: шусьöг – «тайö дженьыд, сёрниö пырöм, велöдана вежöртаса, вежласянöда (ритмическöй) поэтическöй изречение, кодын войтыр уна нэмъяс чöж öтвывтiс (обобщайтiс) ассьыс социально-историческöй опытсö. (3, 1957. - С.11.).

Максима – тайö шусьöглöн сикас, аслыспöлöслуннас ловö сылöн ыджда, тайö развернутöй изречение.

Шусьöг лоö зумыд кывтэчасъяслöн вылi тшупöдöн, вежöртас кутысь медiчöт текстöн. (18, 2002. –  Л.б. 235.).

Мöд асшöр паремика жанрöн лоö кывйöз (кывйöт) - тайö образнöя мотивируйтöм помавтöм серникузя, тырмытöм юкöныс гöгöрвосьö контекст серти. (18,2002. – Л.б. 243.). Сiйö артмöма кыдз öтдортчытöм (абу замкнутöй) клише формаа сёрникузя. Сетö серпасалана (изображаейтана) определениелы экспрессивнöй формаын петкöдчысь дон. Кывйöз мичмöдö сёрни да вöчö сiйöс образнöйöн. (5,1993. – С. 259.).

В. Даль серти: кывйöз – тайö гöгöртана шуöмтор, сэтысь кывкöрталöм он аддзы. Кывйöз – шусьöглöн воддза джынйыс. (19, 1983. –  С. 3.).