Паремические жанры в коми фольклоре

Россияса Федерацияса образование да наука министерство

Образованиеысь федеральнöй агентство

Вылыс тшупöда профессиональнöй образованиеысь государственнöй

велöдан учреждение

СЫКТЫВКАРСА КАНМУ УНИВЕРСИТЕТ

Филология факультет

Коми да финн-угор филология кафедра

 

 

 

Курсöвöй удж

Коми фольклорын паремика жанръяс

031001 «Филология (национальнöй)»  специальность

 

 

 

Уджöн веськöдлысь: доцент, фил. наукаысь кандидат	_______________ В. В. Филиппова
Удж гижысь: 321-öд группаса студент	_______________   Л. М. Ивашева

 

 

 

Сыктывкар 2011

ЮРИНДАЛЫСЬ

1. Водзкыв………………………………………………………….…………3
2. Шöр юкöн:

1. юр.  Фольклористикаын паремика жанръяс туялöмлöн историография…………………………………………………...5
2. юр. Коми фольклорын паремика жанръяс система:

1. Паремиялы да паремика жанръяслы определение сетöм……………………………………………………….22

2. Паремика жанръяс классификация……………..…..28
3. Коми паремика жанръяс система…………………...32

3. Бöркыв…………………………………………………………………….35
4. Библиография……………………………………………………………37
5. Содтöд

 

 

 

 

 

 

 

 

 

 

 

 

 

 

 

Водзкыв

Важ грек кыв «paroimia», код улын гöгöрвосьö: шусьöг, кывйöз, изречение, притча – тöдса важöн нин, но терминологическöй смыслсö босьтiс сöмын бöръя кадö. Öтувтана термин корсьöм вöлi заводитöма важысянь, весиг В.И. Даль «Пословицы русского народа»  чукöр водзкывйын вöлi гижöма, мый  сборникас шусьöгъяс  кындзи сюйöма уна мукöд фольклорнöй изречениеяс, кодъяслы оз куж сетны öтувтана «кличка».

«Паремия» термин лои пыртöма ас кадö, сiйö индiс фольклор изречениеяс да речениеяс матыссалун вылö. Но мукöддырйи «паремия»  термин шымыртö кывйын бергалысь дзик став висьталöмторсö, и та понда термин вермö воштыны ассьыс вежöртассö (4,1957). Медым тайö эз ло, колö быд паремия тип видлавны да видзöдны торйöн.

Коми традицияын, кыдзи и мукöд войтыр традицияын, паремика жанръяс сетöны кывлы аслыспöлöслун да колорит, кодi тöдчöдö кывлысь национальнöй характер.

Коми войтыр олöмын нэмъяс чöж медтöдчанаöсь вöлiны му вöдитöм да скöт видзöм, мый и петкöдчö паремика жанръясын. Вель уна шусьöгын, кывйöзын, нöдкывйын висьтавсьö вöралöм да чери кыйöм йылысь. Ф.В.  Плесовскийлöн социологическöй видзöдлас серти, паремика жанръясын сiдз жö тыдовтчö коми войтырлöн войдор сьöкыд олöмыс. «Сiйöс дзескöдлiсны да нартитiсны попъяс, чиновникъяс, купечъяс, кулакъяс. Сулiсны мукöд неминуча: няньтöм вояс, би да ва, доймалöмъяс  сьöкыд уджъясысь да вöралiгъясöн. <…> Но колö тöдчöдны, мый коми войтырöс некыдз оз позь шуны шогö усьöм йöзöн. Удж – со мый отсалас кöть мыйтакö нин петны тужаысь-нужаысь» (17, 1983.).

Паремика жанръяс важöн нин кыскiсны ас дiнас туялысьясöс. Но ёнджыкасö кутiсны найöс видлавны сöмын бöръя воясö. Фольклористъяс эз на воны öти кывйöдз, мый пыртны «паремия» понятие улö, кутшöм жанръяс лоöны асшöраöн. Медся бура видлалöма шусьöгъяс да кывйöзъяс, мый оз позь шуны налы öткодь, но неуна торъялана мукöд афористическöй тэчаса произведениеяс йылысь. Öнiöдз на мунöны вензьöмъяс, кутшöм определение бурджыка, тырвыйö тöдчöдö сiйö либö мöд жанрлысь аслыспöлöслунсö. Абу на бура сетöма паремияяслысь классификация принципъяс, кутшöм ногöн найöс пыртны сборникъясö: алфавит серти (И.М. Снегирев), темаяс серти (В.И.Даль), логико-семантическöй подход отсöгöн (Г.Л. Пермяков), либö европаса фольклористъяс ног  - ключевöй кывъяс отсöгöн.

Коми фольклористикаын паремика жанръяс этша на туялöма и этша удж, кодъяс мыджсьöны выль теория да методология вылö.

Сэк жö воис кад выль нога видлавны коми паремика жанръяс. Архивъясын чукöртöма выль уна материал, ни öти сы пиысь абу на вöлi видлалöма. Такöд йитöма курсöвöй уджлöн медшöр мог: лöсьöдны коми паремика жанр система.

Содтöд  могъясöн лоöны:

1. Архивъясысь да йöзöдöмъясысь  чукöртны колана материал;

2. Сетны сiйö либö мöд  жанрлы гöгöрвоöдöм;

3. Тöдчöдны жанр артмöдан  серъяс.

Уджлöн теория подув: Е.А. Костюхинлöн «Лекции по русскому фольклору», В.П. Анникинлöн «Русское устное народное творчество», Г.Л. Пермяковлöн «Основы структурной паремиологии» уджъяс.

Уджлöн выльторйыс сыын, мый медводдзаысь вöдитчöма да пыртöма выль материал, тöдчöдöма жанрлы лöсялана серъяс (признакъяс).

Удж артмöма Водзкывйысь, шöр юкöнысь, кытчö пырö кык юр, Бöркывйысь, библиографическöй списокысь да содтöдысь.

 

 

 

 

 

 

 

Шöр юкöн

 

1. Фольклористикаын паремика жанръяс туялöмлöн историография

Уна учёнöй фольклорист да лингвист босьтчылiсны видлавны паремика жанръяс. Быдöн ас ног видлалiсны да торйöдалiсны тайö жанръяссö, разнöя индiсны асшöр жанръяс вылö.

«Русское устное народное творчество» небöгын Аникин В.П. торйöдö татшöм паремика жанръяс:

1. Шусьöгъяс:

• Веськыд вежöртаса (Переученный хуже недоученного);
• Öткодялöм (аналогия) серти:

- утверждение функция (Голому – разбой, а мокрому дождь не страшен);

- отрицание функция (Голому разбой не страшен);

2. Побасенкаяс:  (- Медведя поймал! – Веди сюда! – Да нейдет!

-Так сам иди! – Да не пускает!);

3. Приметаяс: (У Евдокеи вода, у Егорья трава);
4. Кывйöзъяс: (Лыка не вяжет).

Сiдз жö сiйö индö, мый наукаын уна боксянь и тырвыйö видлалöма сöмын шусьöгъяс да кывйöзъяс. Мый оз позь шуны накöд öткодь, но неуна торъялана афористическöй тэчаса произведениеяс йылысь. Медгöгöрвоана паремия типöн Аникин В.П. лыддьö шусьöгъяс, но сыкöд орччöн эмöсь и мукöд типъяс, накöд öткодь, и тайöн ёсьджыка тöдчöдö коланлун гöгöрвоöдны быд паремиялöн разновидностьлысь  «субжанрöвöй» свойствояссö,  налöн аслыспöлöс мировоззренческöй функцияяснас да формаяснас, весиг сэтшöмъяслысь, кодъяс йитчöмась (зависитöны) мöвпъяскöд да художествоа ыззьöмкöд (эмоцияяскöд).

Е.А. Костюхин «Лекции по русскому фольклору» пособиеын гижö, мый шусьöг да кывйöз – тайö öтвывтöм олöм да социально-историческöй опыт.

На костын торъялöмыс сöмын сыын, мый шусьöг – тайö мöвп, грамматика боксянь эштöм сёрникузя, а кывйöз – сöмын зумыд выражение, идиома. Но кывйöз вермö бертовтчыны (преобразуйтчыны) шусьöгö.

Шусьöгъяс да кывйöзъяс уна вежöртасаöсь (многозначнöйöсь) и бергалöны вуджана вежöртасöн (переноснöй значениеöн). Тайö торйöдö найöс афоризмъясысь. Найö оз матыстчыны «моральнöй кодекс» дорö и наöн вöдитчöны сöмын лоöмтор дырйи («к случаю»), мöд ногöн – оккозиональнöйöсь.

Шусьöгъяс петкöдлöны ёнджыкасö оз йöзлысь сюсьлун, а налысь вежöр писькöслун. Найö видзöны ас пытшкас дзонь войтырлысь опыт.

Шусьöгъяслöн унавежöртаслун, кодi сетö позянлун наöн вöдитчыны уна пöлöс лоöмтор дырйи, подуласьö налöн метафоричность вылö.

Автор гижö, мый шусьöгъяс да кывйöзъяс тшöкыда овлöны типичнöй олöмын лоöмторъяслы  образнöй модельясöн. И сы вöсна, мый татшöм типичнöй лоöмторъясыс паныдасьлöны уна войтырлöн, шусьöгъяслöн логическöй тэчасыс уна кывйын артмö öткодьöн. Шусьöгъясын позьö аддзыны и национальнöй,  и интернациональнöй характер.

Шусьöгъясын да кывйöзъясын тыдовтчöны важ кадколастса да христианскöй эскöмъяс, кольöм лоöмторъяс йылысь казьтылöмъяс.  Паныдасьöны и уна пöлöс социальнöй видзöдласъяс да донъялöмъяс. Костюхин Е.А. тöдчöдö, мый шусьöгъяс ас пытшкас босьтiсны йöзлысь социально-историческöй опытсö, найö возраст сертиыс лоöны тшöтшъяöн тайö опытыслы: шусьöгъяс артмисны öттшöтш кывкöд, морфологиякöд. Та вылö видзöдöмöн, некымын туялысь лыддьöны, мый шусьöг артмис басняысь – дженьыд нравоучительнöй историяысь. Но тайö абу сiдз, налöн öшмöснас лоö  анекдот.

Шусьöгъяслöн тематикаыс помтöм. Налöн функция – тайö олöмын лоöмторъяссö донъялöм.

Автор тöдчöдö, мый  медым не вошны шусьöгъяс пöвстын, колö сетны налы юклöм (классификация). Вöлi сетöма некымын юклан принцип, но некод на пиысь абу тырвыйö бур. Алфавит серти (И.М. Снегирев) абу бур сы вöсна, мый шусьöгъяс варьируйтчöны. Тема серти (В.И.Даль) тоже абу бур – шусьöгъяс уна вежöртасаöсь. Логико-семантическöй юклöм (Г.Л. Пермяков) тырмытöмторйыс сыын, мый вниманиеыс усьö сöмын информативнöй момент вылö, и некыдз оз видлавсьы шусьöглöн образностьыс, унавежöртаслуныс. Е.А. Костюхин мед бурöн лыддьö «ключевöй» кыв серти классификация, но тайöн вöдитчöны сöмын европаса фольклористъяс.

Унавежöртаслун сетö позянлун шусьöгъяслы овны нем чöжъясöн, сöмын олöмлöн вежсьöмкöд вежсьö налöн вежöртасыс.

Нöдкывъяслы öткодьлун шусьöгъяскöд сетö метафоричность.

Öткымын учёнöйяс нöдкывъяс артмöм йитöны кутшöмкö ним да кыв шуны бытöвöй да производственнöй кутöдкöд (запреткöд, табукöд), гуся сёрникöд. Нöдлiсны олöмын вежласяна, вуджана кадö.

Важысянь нöдкывлöн функциянас вöлi велöдöм. Öнiя кадö – тайö гажöдчöм, теш, но велöдан функцияыс эз вош.

Нöдкывйын  действуйтö  поэтизируйтан да депоэтизируйтан закон, стöчджыка кö контраст закон: бытöвöй предмет петкöдчö кыпыда (возвышеннöя), а серьёзнöй да джуджыд – вежсьöны бытöвöйöн и весиг тöдчöдана лэдзöмöн (приниженнöя).

Пырджык нöдкывъясын петкöдчö кык предмет – кодöс серпасалöны (изображайтöны) и код йылысь нöдöны. Вежана предмет босьтчö сiйö признакъяс серти, кодъясöс кöсйöны тöдчöдны нöдана предметас. И сы вöсна, мый уна нöдкывйын тöдчöдöны разнöй признакъяс, öти предметкöд вермöны йитчыны дзик разнöй нöдкывъяс. И сiдз жö нöдкыв вермö йитчыны некымын вочавидзöмкöд. Тайö висьталö сы йылысь, мый эмöсь сэтшöм паськалöм метафораяс, кодъяслöн абу öти, а некымын вежöртас.

Т.В. Зуева да Б.П.  Кирдан «Русский фольклор» учебникын паремика жанръясöн лыддьöны:

• Шусьöгъяс
• Кывйöзъяс
• Тöдöмъяс (Приметаяс)
• Нöдкывъяс
• Прибауткаяс
• Кывшусьöгъяс
• Кывбертласъяс
• Кывворсöмъяс (каламбуръяс)
• Бур сиöмъяс
• Ёркывъяс да с.в.

Но «Малые жанры фольклора. Паремии» главаын видлалöны сöмын шусьöгъяс, кывйöзъяс да нöдкывъяс.

Авторъяс лыддьöны, мый шусьöглы определение сетсьö разнöя сы понда, мый войтырлöн изречениеяс абу öткодьöсь асланыс образность, композиция, синтаксис, кад да ин артмöм сертиыс.

Медся стöчöн лыддьöны 1978 вося учебнöй пособиеын шусьöглысь определение: шусьöг – тайö дженьыд, инмалысь, войтырлöн пыдi вежöра изречение либö суждение олöмын лоöмторъяс йылысь, кодъясöс петкöдлöма художествоа формаын. ( 49, 1978. – С. 103.).

Туялысьяс гижöны, мый шусьöгъясын да кывйöзъясын ёнджыкасö тыдовтчöны уна боксянь удж да йöз костын öта-мöдкöд йитöд: радейтчöм, другасьöм, лöгалöм, наука да тöдöмъяс дорö, вöр-ва вылö видзöдласъяс; наын тыдовтчö став боксяньыс  мортлöн олан этш да моральнöй качествояс.

Зуева Т.В. да Кирдан Б.П. гижöны, мый шусьöг да кывйöз чужисны разнöй классовöй да социальнöй группаясын, разнöй профессияа да занятиеа йöз костын. И артмисны не сöмын олöм бöрся видзöдöмъясысь (наблюдениеясысь), но и пырисны народно-поэтическöй да литератураа произведениеясысь, заимствуйчисны мукöд кывъясысь. Сiдзжö выль шусьöгъяс да кывйöзъяс артмöны важъясöс вежлалöмысь, кодъяслы сетсьö выль вежöртас. Мукöддырйы мунö переосмысление процесс, кор нинöм оз вежсьы шусьöгын либö кывйöзын, а гöгöрвоöны найöс öнiя кадлы лöсялана вежöртасöн.

Художественнöй аслыспöлöслун шусьöгъяслы да кывйöзъяслы сетöны метафора, метонимия, синекдоха, сравнение, гипербола, антитеза, зумыд эпитетъяс. Сiдзжö тшöкыда босьтчöны ас нимъяс  нарицательнöй вежöртасын. Вöдитчöны уна формаа тавтологияöн: омонимическöй, синонимическöй.

Шусьöгъяс  öдлунаöсь (ритмичнöйöсь). Тшöкыда паныдасьлö öтгор (рифма ): торъя кывъяс костын, шусьöглöн торъя юкöн костын  либö дзоньнас шусьöгыс.

Шусьöгъяс вермöны петкöдчыны высказывание боксянь разнöй формаын: косвеннöй серни, öтка сёрни (монолог), морта-морт сёрни (диалог).