Жауапкершілігі шектеулі серіктестікті құру

Жауапкершілігі шектеулі серіктестіктерді қосу, біріктіру

 Екі немесе  бірнеше жауапкершілігі шектеулі  серіктестікті қосу осы серіктестіктердің  мүлкін толық біріктіру арқылы  жүзеге асырылады. Қосу нәтижесінде  жаңа серіктестік пайда болады. Жаңа серіктестіктің құрамына  кірген серіктестіктер өз қызметін  тоқтатады. Бұл орайда серіктестіктерді  қосуға қатысушылардың әрқайсысының  барлық құқықтары мен міндеттері  өткізу актісіне сәйкес жаңадан  пайда болған серіктестікке ауысады.

Бір немесе бірнеше жауапкершілігі шектеулі серіктестіктердің басқа жауапкершілігі шектеулі серіктестікке бірігуі қосылатын серіктестіктердің мүлкін қосып алушы серіктестіктің мүлкіне енгізу арқылы жүзеге асырылады. Бұл ретте бірігуші серіктестіктер тоқтатылады, ал олардың барлық құқықтары мен міндеттері өткізу актісіне сәйкес біріктіруші серіктестікке ауысады, оның жарғысына қайта ұйымдастыруға байланысты өзгерістер енгізіледі.

Қосуға, бірігуге қатысушы жауапкершілігі шектеулі серіктестіктердің атқарушы органдары қосу, бірігу туралы шарттардың жобаларын дайындайды және қосу, бірігу туралы мәселені әрбір серіктестікке қатысушылардың жалпы жиналысының қарауына және қосу, бірігу туралы шартты бекітуіне енгізеді.

Қосу, бірігу туралы шарттың келісілген мәтініне серіктестіктердің осыған уәкілетті атқарушы органдары қол қояды.

Қосу, бірігу туралы шарт қосуға, бірігуге қатысушы әрбір серіктестіктің фирмалық атауы, орналасқан жері мен мекен-жайы туралы мәліметтерді, олардың баланстарының негізгі деректерін қамтуға, сондай-ақ онда қосудың, бірігудің тәртібі мен жағдайлары көзделуге тиіс.

 Жауапкершілігі  шектеулі серіктестіктерді қосуға, бірігуге қатысушылардың әрқайсысы  өз қатысушыларының жалпы жиналысы  қосу, бірігу туралы шешім қабылдаған  күннен бастап екі ай мерзім  ішінде өзінің барлық кредит  берушілеріне қосу, бірігу туралы  жазбаша хабарлама жіберуге және  ресми баспасөз органдарында  тиісті хабарландыру беруге міндетті. Хабарламаға (хабарландыруға) қосуға, бірігуге қатысушы басқа серіктестіктер  туралы мәліметтер тіркеледі.

Серіктестіктің кредит берушілері хабарлама алған немесе хабарландыру жарияланған күннен бастап екі ай мерзім ішінде серіктестіктен қосымша кепілдіктерді не серіктестіктің тиісті міндеттемелерді мерзімінен бұрын тоқтатуын немесе орындауын және зияндарды өтеуін талап етуге құқылы. Талаптар серіктестікке жазбаша түрде жіберіледі, ал олардың көшірмелері серіктестікті мемлекеттік тіркеуді жүзеге асырған органға берілуі мүмкін.

Қосуға, бірігуге қатысушы жауапкершілігі шектеулі серіктестіктің әрқайсысы өз қатысушыларының жалпы жиналысы қосу, бірігу туралы шешім қабылдаған кезден бастап, шешім қабылданғаннан кейін пайда болатын міндеттемелер бойынша кредит берушілерге бұл шешім туралы хабарлауға міндетті.

Серіктестіктердің қосылуы, бірігуі туралы шарттың негізінде қосылушы, бірігуші серіктестіктерге қатысушылар құрылтай шартын әзірлеп, құрылтай жиналысында оған қол қояды, ал қосылған кезде жаңадан құрылып жатқан серіктестіктің жарғысын бекітіп, серіктестіктің атқарушы және өзге де органдарын сайлайды.

Жауапкершілігі шектеулі серіктестікті бөлу, бөліп шығару

 Жауапкершілігі  шектеулі серіктестікті бөлу  осы серіктестіктің мүлкін жаңадан  пайда болатын екі немесе бірнеше  жауапкершілігі шектеулі серіктестік  арасында бөлу арқылы жүзеге  асырылады. Бұл орайда бөлінетін  серіктестіктің құқықтары мен  міндеттері бөлу балансына сәйкес  жаңадан пайда болатын серіктестіктерге  ауысады.

 Жауапкершілігі  шектеулі серіктестіктен бір  немесе бірнеше жауапкершілігі  шектеулі серіктестікті бөліп  шығару серіктестік мүлкінің  бір бөлігін бөліп шығарып, оны  жаңадан пайда болатын бір  немесе бірнеше серіктестікке  беру арқылы жүзеге асырылады. Бұл орайда қайта ұйымдастырылып  отырған серіктестіктің құқықтары  мен міндеттерінің бір бөлігі  бөлу балансына сәйкес жаңадан  пайда болатын серіктестіктерге  ауысады.

 Қайта  ұйымдастырылып отырған жауапкершілігі  шектеулі серіктестіктің атқарушы  органы бөлу, бөліп шығару жоспары  мен жаңадан пайда болатын  серіктестіктер жарғыларының жобаларын  дайындайды және қатысушылардың  жалпы жиналысының қарауына серіктестікті  бөлу, бөліп шығару туралы, бөлу, бөліп шығару жоспарын, жаңадан  пайда болатын серіктестіктердің  жарғылары мен бөлу балансын  бекіту туралы, сондай-ақ жаңадан  пайда болатын серіктестіктердің  атқарушы және өзге де органдарын  сайлау туралы мәселелерді енгізеді.

 Егер  жауапкершілігі шектеулі серіктестіктің  жарғысында өзгеше көзделмесе, оны  бөлу, бөліп шығару кезінде әрбір  қатысушы жаңадан пайда болатын  әрбір серіктестіктің жарғылық  капиталынан қайта ұйымдастырылып  жатқан серіктестіктің жарғылық  капиталындағы өз үлесіне тең  үлес алуға құқылы.

 Жауапкершілігі  шектеулі серіктестік өз қатысушылардың  жалпы жиналысы бөлу, бөліп шығару  туралы шешім қабылдаған кезден  бастап бұл шешім туралы кредит  берушілерге шешім қабылданғаннан  кейін пайда болатын міндеттемелер  жөнінде хабарлауға міндетті.

 Жауапкершілігі  шектеулі серіктестік өз қатысушыларының  жалпы жиналысы бөлу, бөліп шығару  туралы шешім қабылдаған күннен  бастап екі ай мерзім ішінде  өзінің барлық несие берушілеріне  бөлу, бөліп шығару туралы жазбаша  хабарлама жіберуге және ресми  баспасөз органдарында тиісті  хабарландыру жариялауға міндетті. Хабарламаға (хабарландыруға) бөлу  балансы, сондай-ақ жаңадан пайда  болатын әрбір серіктестіктің  фирмалық атауы, орналасқан жері  мен мекен-жайы туралы мәліметтер  қоса тіркеледі.

 Қайта  ұйымдастырылып жатқан жауапкершілігі  шектеулі серіктестіктің кредит  берушілері хабарлама алған (хабарландыру  жарияланған) күннен бастап екі  ай мерзім ішінде серіктестіктен  тиісті міндеттемелерді мерзімінен  бұрын тоқтатуды немесе орындауды  және зияндарды өтеуді талап  етуге құқылы. Талаптар серіктестікке  жазбаша түрде жіберіледі, ал  олардың көшірмелері серіктестікті  мемлекеттік тіркеуді жүзеге  асырған органға берілуі мүмкін.

  Жауапкершілігі шектеулі серіктестікті  бөлу, бөліп шығару нәтижесінде  пайда болған жауапкершілігі  шектеулі серіктестіктер жаңа  серіктестіктер тіркелген кезден  бастап бір жыл бойы оның  міндеттемелері бойынша ортақ  жауапкершілікте болады. 

Жауапкершілігі шектеулі серіктестікті қайта құру

Жауапкершілігі шектеулі серіктестік өзге шаруашылық серіктестік, акционерлiк қоғам немесе өндірістік кооператив болып қайта құрылуға құқылы, өткізу актісіне сәйкес қайта құрылатын серіктестіктің барлық құқықтары мен міндеттері соған ауысады.

Қайта құрылатын жауапкершілігі шектеулі серіктестіктің атқарушы органы қайта құрудың тәртібі мен шарттарын белгілейтін қайта құру жоспары мен жаңадан пайда болатын акционерлiк қоғам заңды тұлға жарғысының жобасын дайындайды және серіктестікті қайта құру, қайта құрудың жоспары мен жарғыны бекіту, сондай-ақ жаңадан пайда болатын серіктестіктің немесе өндірістік кооперативтің атқарушы және өзге органдарын сайлау туралы мәселелерді қатысушылардың жалпы жиналысының шешім шығаруына енгізеді.

 Жауапкершілігі шектеулі серіктестікті қайта құру нәтижесінде құрылған акционерлік қоғам қоғамның акцияларын тек қана жауапкершілігі шектеулі серіктестіктің қатысушылары арасында орналастырады (сатады). Қайта құрылған жауапкершілігі шектеулі серіктестіктің қатысушыларына берілетін акциялардың саны әрбір қатысушының үлесінің баланстық құнының қайта ұйымдастырылатын жауапкершілігі шектеулі серіктестіктің меншікті капиталының жалпы мөлшеріне арақатынасы негізінде айқындалады.

 Құрылатын акционерлік қоғамның жарғылық капиталы оған қабылдау-тапсыру актісіне сәйкес берілген активтер мен міндеттемелер арасындағы айырмаға тең болады және "Акционерлік қоғамдар туралы" Қазақстан Республикасы Заңының 10-бабында белгіленген талаптарға сәйкес келуге тиіс.

Қайта ұйымдастыру нәтижесінде пайда болатын серіктестікті мемлекеттік тіркеу

 Қайта  ұйымдастыру нәтижесінде пайда  болатын жауапкершілігі шектеулі  серіктестікті мемлекеттік тіркеу  заңды тұлғаларды тіркеудің заң  актілерінде белгіленген ережелеріне  сәйкес жүзеге асырылады.

  Қайта ұйымдастыру нәтижесінде  пайда болатын жауапкершілігі  шектеулі серіктестікті мемлекеттік  тіркеуді заңды тұлғаларды мемлекеттік  тіркеуді жүзеге асыратын орган  қайта ұйымдастыруға қатысушы  серіктестіктерге қойылатын талаптарды  мәлімдеу үшін кредит берушілерге  берілген мерзім өткеннен кейін  жүргізеді  Егер заңды тұлғаларды  мемлекеттік тіркеуді жүзеге  асыратын органға серіктестіктерді  қайта ұйымдастыруға қатысушы  кредит берушілер талаптарының  көшірмелері келіп түссе, жаңадан  пайда болатын серіктестік бұл  талаптардың орындалуының немесе  оларды мәлімдеген кредит берушілердің  қайта ұйымдастыруға қарсылықтары  жоқ екендігінің дәлелдерін берген  жағдайда тіркеледі.

 Егер  қайта құруға қатысушы соңғы  жауапкершілігі шектеулі серіктестікке  қатысушылардың жалпы жиналысы  қайта құру туралы шешім қабылданған  күннен бастап бір жыл ішінде  мемлекеттік тіркеу туралы арыз  берілмесе не қажетті дәлелдер  ұсынылмаса, қайта ұйымдастыру жүргізілмеді  деп есептеледі.

 

Жауапкершілігі шектеулі серіктестікті тарату

 Жауапкершілігі  шектеулі серіктестік оның қатысушыларының  жалпы жиналысының шешімімен  таратылуы мүмкін. Cонымен қоса  сот шешімі бойынша жауапкершілігі шектеулі серіктестік егер ол:

1) банкрот  болған;

2) серіктестікті  құру кезінде жоюға болмайтын  сипатта заң бұзушылыққа жол  берілуіне байланысты оның тіркелуі  жарамсыз деп танылған;

3)қызметті  тиісті рұқсатсыз (лицензиясыз) немесе  заң актілерімен тыйым салынған  қызметті не заңдарды бірнеше  рет немесе өрескел бұза отырып  жүзеге асырған жағдайларда;

4)заң актілерінде  көзделген басқа да жағдайларда  таратылуы мүмкін.

 

Жауапкершілігі шектеулі серіктестіктің жалғыз қатысушысы болып табылатын заңды тұлға таратылған жағдайда мұндай серіктестік таратылуға тиіс. Бұл орайда серіктестікті тарату жөніндегі тарату комиссиясын (таратушыны) серіктестік құрылтайшысын таратуды жүргізетін тарату комиссиясының (таратушының) өтініші бойынша сот тағайындайды.

Жауапкершілігі шектеулі серіктестікті банкрот болған немесе серіктестікті құру кезінде жоюға болмайтын сипатта заң бұзушылыққа жол берілуіне байланысты оның тіркелуі жарамсыз деп танылған  негіздер бойынша тарату туралы талапты сотқа, егер заң актілерінде өзгеше көзделмесе, мүдделі адамдар қоюы мүмкін.

  Соттың жауапкершілігі шектеулі  серіктестікті тарату туралы  шешімімен таратуды жүзеге асыру  жөніндегі міндеттер серіктестіктің  өзіне; серіктестіктің уәкілетті  органына; оның құрылтай құжаттарымен  серіктестікті таратуға уәкілетті  органға, не сот тағайындаған  өзге органға (адамға) жүктелуі мүмкін.

Жауапкершілігі шектеулі серіктестіктің қызметі тоқтатылады: 

1) егер жарғылық  капиталды азайту нәтижесінде  оның мөлшері табыс етілген  күнгі айлық жүз есептік көрсеткіш  мөлшерінен аз болып қалғанда;

2) егер қатысушылар  серіктестікті тіркеген күннен  бастап бір жылдан аспайтын мерзім ішінде серіктестіктің жарғылық капиталын құрмаған жағдайлар негіз болуы мүмкін.

  Жарғылық капиталды азайту нәтижесінде  оның мөлшер,жоғарыда көрсетілген екі жағдай болғанда, қатысушылар бір жыл ішінде жарғылық капиталға тиісті қосымша салымдар енгізуі қажет. Бұлай болмаған жағдайда серіктестік мүдделі адамдардың өтініші бойынша сот шешімімен таратылуға тиіс.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Қорытынды бөлім

 

Сонымен бір немесе бірнеше адам құрған, жарғылық капиталы құрылтай құжаттарымен белгіленген мөлшерде үлестерге бөлінген серіктестік жауапкершілігі шектеулі серіктестік деп аталады..

 Жауапкершілігі  шектеулі серіктестік заңды тұлға  болып табылады және ол өзінің  міндеттемелері бойынша өзіне  тиесілі барлық мүлікпен жауап  береді,бірақ серіктестік өз қатысушыларының  міндеттемелері бойынша жауап  бермейді.

  Серіктестіктің жарғылық капиталға  салымдарын толық енгізбеген  қатысушылары оның міндеттемелері  бойынша әрбір қатысушының салым  енгізбеген бөлігінің құны шегінде  ортақ жауапты болады.

Жауапкершілігі шектеулі серіктестіктің серіктестік атауын, сондайақ "жауапкершілігі шектеулі серіктестік" деген сөздерді немесе "ЖШС" деген аббревиатураны қамтуға тиіс фирмалық атауы болады.

Жауапкершілігі шектеулі серіктестіктің орналасқан жері деп оның тұрақты жұмыс істейтін органының орналасқан жері танылады.Егер өзінің орналасқан жерін ауыстырған жағдайда серіктестік заңды тұлғалардың мемлекеттік тізіліміне қажетті өзгерістер енгізу үшін бұл жөнінде оның мемлекеттік тіркелуін жүзеге асырған органға және серіктестіктің жаңадан орналасқан жері бойынша заңды тұлғалардың мемлекеттік тіркелуін жүзеге асырушы органға хабарлауға міндеттеледі.

Жауапкершілігі шектеулі серіктестікті құру оның құрылтайшыларының құрылтай шартын жасасуынан (ЖШС туралы Заңның14 бабы ) басталып, серіктестікті заңды тұлға ретінде мемлекеттік тіркеуден өткізумен (ЖШС туралы Заңның 19 бабы) аяқталады.

Жауапкершілігі шектеулі серіктестіктің жарғылық капиталы құрылтайшылардың (қатысушылардың) салымдарын біріктіру жолымен құрылып,ол жарғылық  капиталдың бастапқы мөлшері құрылтайшылар салымдарының сомасына тең болады және серіктестікті мемлекеттік тіркеу үшін құжаттар табыс етілген күнгі айлық жүз есептік көрсеткіштің мөлшеріне бара-бар сомадан кем болмауы керек.